كتب الشاعر بلشقر محمد للمحيط العربي قصيدة بعنوان هو غارق في النعايم
🥝🍒هو غارق في النعايم🍎🍇
هو غارق في النعايم
والمواطن في الهم عايم
على طراف البحر هايم
مفرش الرملة ونايم
صابر أصبر لبهايم
الناس تاكل من الوزيعة
وهو ديما صايم
باركة علينا من النقايم
زيد في راسك هذيك الفهايم
سبحان الحي الدايم
هو اللي يخلصك
ياللي غارق في النعايم
*******
ما بقى يشوف
ما بقى يسمع
كلشي كيتوجع
وهو ما بغى يشبع
مصائب كثيرة صابته
وما بغاش يتردع
تصرفاته ولات تخلع
كرشو قد الطبل
وما بغى يقنع
يا هذاك
راه بغينا الشمل يتجمع
قبل ما الرمانة تفرگع
ويمشي فيها الذيب والسبع
*******
راه اليوم ليك وغدا لينا
باركة من الزرود
الذبايح كل نهار
والنص في المغاربة في البحور مفقود
خيراتنا كتبدر قدام عينينا
والمسكين كتكذبو عليه
بالزيت والسكر وفارينة
رد بالك بنادم ما يتهان
مول الحق ناصرو ربي من زمان
كون قانع ودير بحساب الغير
باركة من الرشاوي
وضريب الكاس والتبدير
راك زعزعتي لينا العقيدة
ما بقينا عارفين
فين غاديين بهذه البلاد الحبيبة
*******
الدين راه نصيحة
الحر بالغمزة
بغينا الثروة نقسموها كاملين
ماشي أنتما منعمين
وفي الخيرات غارقين
وحنا معذبين
راه حقنا ما نسمحوا فيه
حتى عند رب العالمين.
مجدوب الحرف : بلشقر محمد
تعليقات
إرسال تعليق