كتب الشاعر رشيد الجلولي للمحيط العربي زجلية بعنوان قنديل حياتنا
هييييي عليك يا ݣُفة
ديما مقتا مانشوفوك ب لوفا
لبسو لحرير
وخلاونا ب لحفا
لمن نحكيو
لمن نشكيو
لمحاين على ظهرنا تجمعات
على جيها مالت لكفًَة
لحوت ف لبحر
لفوسفاط ف لبر
زلطنا كبر
طوال وشبر و رَبَّى جلفة
لعيون ب دموع فاضت
ريوس تنفخت و شابت
ظهور تقوست وعابت
قنديل حياتنا طفى
طفى علينا غير حنا وقنديلهم ضاوي
ف لقيمة ساوي
واكل شارب و مداوي
ميزانو مساوي نغامو مسموعة ب صفى
ما هازينها منين ثقالت
دموع ليتامى سالت
على لخدود رسمت لحزان
كلتو لحبة ورميتو علينا سفا
أمالنا ف الله كبير
فضلو علينا كثير
مزال يتصلح حالنا
ومزال ما لغدير يصفى
زجلية بعنوان " قنديل حياتنا "
رشيد الجلولي
٠
تعليقات
إرسال تعليق