كتب الشاعر عزالدين جبريل للمحيط العربي قصيدة بعنوان هاسكت خالص
هاسكت خالص
مش راح أئن ولاهتكلم
مش راح أقول مجروح
لو بعنيكم شفتو الجرح
فى القلب معلم
مش هشكى حالى لحد
حتى ولو بلغت الحد
أصلى كلامى مهوش نافع
يبقى لية عن حقى أدافع
إنتو وبس بتعرفو تشكو
وفيكو لسان بتقدرو تحكو
أما لسانى ياعينى مشلول
ولايعرف يحكى ولا بيقول
وملقتش معاكو حلول
عود وزرعتة وهايش
ولا شفتش منة الخير
جنحاته كبيرة لكنة ماطرش
وكل ماليا دفعتة أنا فية
لكن ..... موصلش
أصل الدنيا دى مسرح
وإحنا حكاية عليها
شجرة تضلل شجرة بتطرح
وشجرة كبيرة ملهاش مطرح
ناس أحزانها أيام وسنين
وناس يوماتى بتفرح
شجرة فرحتنا دبلان عودها
ودايما خالفة فى الطرح وعودها
أيام ماشية وسنين بتمر
ولافرحة بتيجى تزورنا
ولا زرعتنا حالها يسر
جبرنا خواطر ناس تانيين
ومعاهم كل القسوة كانت بتلين
ولما نبص لحالنا بننكر
ونقول دول ناس تانيين
لية ياكلامى كلك واعر
ولافاهمينك
ولا بجراحك حدش شاعر
بتعمل دوشة لجل تفرح ناس
وعلشان الطيبة دايما منداس
حكيت ع الحب لكن ولا عشتة
وحبيبى راح من إيدى سكت وسبتة
شربت كل كاسات الصبر
وحليت بعدية كمان بالمر
عدى خلاص ياعمر ومر
حكايتنا خلصت و مبدأناش
والذكرة مدفونة فى روحنا
ولما بتخطر بتئن جروحنا
وبنكدب ونقول أيام تتعاش
أحلى مافينا أهو ضاع وخلاص
ولا فينا لبعض ذرة إخلاص
فضلنا بنكدب لكنة الكدب خلاص
حقيقة وباينة وأدينا شايفين
مين فينا بيضحك على مين
شفتى يادنيا وصلنا لفين
كل همومنا نجرح بعض
حتى نسينا كلامنا
و خلفنا مع بعض الوعد
وعد مابينا كان متصان
نخاف على بعض ونعيش فى أمان
دب الخوف وعبى قلوبنا
تابو الناس صلو وصامو
بس إحنا إللى ماتوبنا
وكتر الفكر خلاص دوبنا
قصور بنيناها ولاسكناش
وأكلنا ف بعض ولاشربناش
ومش هتكلم تانى
أدينى سكت خلاص
الشاعر/عزالدين جبريل
تعليقات
إرسال تعليق