كتب الشاعر عبد الحميد وهبه للمحيط العربي قصيدة بعنوان حِمل إضافي
( حِمل إضافي )
بعد سنين م الحب الصافي
والأشواق والحضن الدافي
فجأة لاقيتني باقيت في حياته
يعني مجرد حِمل إضافي
بعد سنين قضّيتها معاه
سِبت الدنيا أنا لجل هواه
بِعت العالم كله عشانه
ومافكّرتش لحظة أنساه
ياما كتير من عمري إديّتُه
جوه القلب كمان خبيّتُه
حتى الحب اللي أنا حبيّتُه
كل ده فعلاً كان مش كافي
بعد سنين م الحب الصافي
بعد سنين حبيتُه وبَعشق
روحُه بدون شكل أو لون
فجأة الشكل خلاص بقى يفرق
ع اللي في قلبه والمضمون
ليه كده فجأة إتغيّر حالُه
بعد ما عِشت سنين في خيالُه
ليه دلوقتي خلاص أصبحت
حاجة عادية أنا بالنسبالُه
بقلمي عبدالحميد وهبه
تعليقات
إرسال تعليق