الشاعر هشام سليم وقصيدة (غير السكوت)
غير السكوت
عشش عنكبوت
ف بيت الغوالي
وحبه ياناس يحلالي
بيت كات فيه البسمة
علي وجوه مبتسمة
فيه الفرح الغالي
ف بيتنا كان زعيق
ينادي رفيق وصديق
الباب علي طول مفتوح
وهواه يرد الروح
علي طول كلمة اتفضل
مش مهم مين
الجاي عمره محيعطل
فرح البني آدمين
نضحك لما ندمّع
ونقول يجعله خير
لكل الدنيا نسمّع
الفرحة اللي بضمير
مكنش بييجي ضيوف
الكل صاحب بيت
الكل ع المكشوف
لو ناكل فول بالزيت
كله علي ماقُسم
اللقمة كانت تنقسم
مع أب وكمان أم
مايعرفوا هم و غم
أبويا كان سمّيع
لفن زمان البديع
وكمان حافظ قرآن
وبيسجد للرحمن
وأمي عاشقة النضافة
بلطافة أهي وخفافة
الفقر مكنش يبان
كنا أغنيا
بقناعة وبإيمان
بنكره أغبيا
سابوا الدار حزينة
وغرقت السفينة
قولي ياعنكبوت
لسه لاقي خير
ف بيت شبه التابوت
مش بيتنا دا انهي بيت
قناديل بيتنا انطفت
والدار بالضلمة اكتفت
حقولها لما التفت
وألاقي الدار ف غمة
واصرخ بأعلي صوت
ملعون أبوك ياموت
انتا سبب الغمة
انتا اللي خدت أبويا
فين ضحكتك ياامه
هشام سليم
كنج العربي
شاعر الحرافيش
تعليقات
إرسال تعليق