كتب الشاعر احمد الشريف حسين للمحيط العربي قصيدة بعنوان شروق وغروب
( شروق وغروب )
قال الشاعر :
...............
ياريس يللى معدى
بالمركب تعالى وهدى
بسلام روق اسمعنى
عدينى الى البر التانى
الوقفة طالت تعبتنى
حبيبي ونبضى وحشنى
من بدرى واقف مستنى
تعلالى قوام قربلى
بالدفه حود قدامى
بسقالة اوعى توقعنى
نداه رانن فى ودانى
معاه عاينه احساسى
ما تكون سبب تاخيرى
وعتاب منه يوترنى
ولاظرف يسبب عطلى
وأستنى إللى يجرالى
شراعك افرده دلوقتى
الموج جه هيوصلنى
والريح حب يودعنى
يهدى الوقت ويسعفنى
قلبه بحسه شايفنى
البحر اللى حايشنى
لشوقى شغفه عايزنى
يلا قوام وصلنى
حبيبي حايز قلبى
ملهوف قلقان متمنى
بميعاد قربى يتهنى
متعة لقاه تبسطنى
يلا قوام وصلنى
بطبع البحور ماعرفشى
انا من غيره ما بنامشى
يلا قوام وصلنى
مينفعش ابقى لوحدى
لتغيب الشمس ويمشى
والليل يمسى ما اشوفشى
ما ينفعش اقعد واستنى
هم قوام وصلنى
الأجرة شيلهالك
ومعروفك ما هنكره
وجميالك حفظاهالك
في غيبتك هشكرك
أرجوك أوعى تلوعنى
هم قوام وصلنى
روح الله يخليك
ويطرح البركه فيك
يصون بيتك وعيلتك
انت عملت إللى عليك
سلامى موصول بالخير
خلاص وصلت اليه
من قلبى شكرا ليك
...........................
احمد الشريف حسين
تعليقات
إرسال تعليق