كتبت الشاعرة سهام ماجد لمنتدى المحيط قصيدة بعنوان يا زارع الشوك
يـازارع الشوك
!!!
يازارع الشوك ليه بالشوك بتأذيني؟
دا الجــرح منك نار قايدة بتكويني
والقلب منك عليل مالقيتله والله دوا
ياريت مره تنسى وبالورد تهاديني
*****
بكفاية قولة آه اترسمت على جبيني
والآهه بين الضلوع حرقت شرايني
ياحزن انت ليه..؟ ليا أنا عاشق ؟
ابعـد بقى عنى خلي الهنـا يجيني
*****
ليه كل فرحه تجيني تاخدها من بدري
ألقى بدالها دموع جوا العيون تجري
لإمتى هبقى سجينـه عايشــه بأحزاني
والهنا يفضل حلم للباقى من عــمري
*****
ياعتمة الايام مش شايفه هنا قصادي
عايشه ورا القضبان اصرخ وانادي
مين فـيكم ياناس بالفرح يهــاديـنـي
ولامكتوب لي اعيش مكتوفة الايادي
*****
قواوا ليه مقدر للحزن أكون اســيـر
ولا الحنان اتعدم ومات فينا الضمير
اه يازمن ياما شــفنا فيك العجب
لو بايدى الاختيار لطالبتك بالتغيير
*****
قولوا لي ياناس فين الهنا ألاقيه
لو فى أى مكان هروح له واشتريه
أصل الحكايه قصة ألم عيشتها من سنين
ومهما كان التمن راضيه انا بيـــه
*****
يادنيا ليه بتزيدي فى قلبي المواجع؟
وليه الحزن بيزيد والفرح مش راجع؟
دا قـلبي سـكنه الألـم وللهنا مش فاكـر
بصرخ واقول الآه والكل مش سامع
بقلمي
سهــ ماجد ــام
@الجميع
تعليقات
إرسال تعليق