كتب الشاعر سليمان علي محمد لمنتدى المحيط قصيدة بعنوان مين حكالك
مين حكالك. ( سجال على قصيدة الشاعرة
ءءءءءءءءء سهام ماجد )
مين قالك
ومين حكالك
ومين وسط الزنقة
مد الخطوة جالك
ومين لو صابك حزن
مسح دموعك
وريح بالك
كتير تسأل
مين ومين
وإحنا فى
سواقى الدنيا مربوطين
ساعتها تشوف الفرحة
ف وشنا
ولا تعلم نار الألم
تكوى مترحمنا
إحنا ياصاحبى
ع الوجع واخدين
نطيب خاطرنا بنفسنا
زى الجبل واقفين
لا نمد إيد العوزة
ولا نقول محتاجين
لقيت بلاد ودروب
وحلفت كتير أتوب
لكن أصل اللى ربانى
عن الرجولة
عمرى ناغيب
لقيت وشوش كدابة
وإدين ساعة الحزن
متسابة
ولقمة العيش والملح
تهون على ناس دبابة
بقيت أدارى همى
و احفظ حيائى ودمى
مبقاش ف وقتنا دلوقتى
سندك لاهالى وعمى
شديت دراعى وفارده
وأعرق عشان رغبفين
وتعرف يوم ياصحبى
مين جه وشالك
وف الشتا ميدَفّى
جسمك غير شالك
ولاتندم على معروف
قدمته وما جالك
تعرف إن البشر
زى فصول السنة
ممكن تلاقى الحلو
وممكن تلاقى المر
بس الأصيل دائما
ميسيبك
لو صابك شر
الشاعر سليمان على محمد سليمان
تعليقات
إرسال تعليق