كتب الشاعر فاخر البناني للمحيط العربي قصيدة بعنوان اه ياوطن
هذه القصيدة باللهجة التونسية اثر غرق العشرات في مياه البحر بجهة جرجيس بتونس اثر محاولاتهم الإبحار خلسة الى ايطاليا رحمهم الله
آه يا وطن نزفك شديد
آه نشكي بين الضلوع وجيعة
الحلم صار بعيد بعيد
ولادك في غريڨ البحر وديعة
نبكي عليك الدم و نزيد
يا حرڨي ڨوية الليعة
هاذم ولادك مش عبيد
اصل الجذور من الزريعة
آه يا وطن نزفك شديد
في كل دار ثمة دفينة
دموع تجري مع التنهيد
مقواها فجيعة الحنينة
تبكي و تنادي مع الترديد
يا وليدي رانا ترزينا
هزك موج عالي بعيد
بالدم تبكي عينينا
كبرتك يا وليدي في بالي
تكبر و تكون سندي في الحياة
طفى حلمي الموج العالي
كيف جاني خبر الممات
تمنيتك عريس على الخيالي
ناخذلك زينة البنات
سهرة و فن و سبعة ليالي
وخياتك عماتك و الخالات
في عرسك بشطحو ميالي
على غناية زرڨ الوشمات
نعشڨها بربي اعطوهالي
وليدي شمعة في الظلمات
موج البحر طفهالي
يا سمح الرجالة و الصفات
روحك عند ربي العالي
آه يا وطن نزفك شديد
نشكي بين الضلوع وجيعة
الحلم صار بعيد بعيد
ولادك في غريڨ البحر وديعة
حكم ربي و ما يريد
مكتوب مسطرة الوجيعة
فاخر البناني
تعليقات
إرسال تعليق