كتب الشاعر مصطفى عبد النبي للمحيط العربي قصيدة بعنوان حب زائف

 حب زائف

*******

اللي كان بيني وبينك

مفضلش منه غير ذكريات

كلام كتير فصل اللي بينا

مش حنعيده تاني وخد وهات

نكته بايخة وضحكة ماسخة

وغمرة عين وشوية آيفهات

وشوية غيرة وشوية حيرة

وكام صورة فى السيديهات

حتى جواباتك قريتها ورميتها

 مع كراكيب من اللي فات

انتي حبك زيف وتمثيل

وانا قلبي اخضر بفيونكات

قلبي اللى حبك وجبته لحدك

خليته مشاعره في المهملات

فاكره ميعادي هناك في المعادي

وانا  بستنى واعد الساعات

واغفر لعذرك واسامح عوايدك

وعينيكي سارحة في حد فات

انسي اللي كان ده كان زمان

حبك دفنته ...وشبع ممات

وقلبي جلدته ونزلت حرارته

تاب عن حبك وبطل أهات..

مصطفى عبد النبى.