كتب الشاعر مصطفى عبد النبي للمحيط العربي قصيدة بعنوان مزاد

 مزاااااد

*******

ألا أونا ألا دو ألا تري

مين يشترى مين حياخد

مين يزود مين يفاصل.

مين حيكون شاهد عيان

على كل اللي حاااصل..

الا أونا الا أونا..

مين يزود مين حياخد

كله يفاصل كله يرمي

مزاد كيير وناس كتير

كله بيعرض أغلى ماعنده

مين يشتري مين حياخد

مين يعلي سعره واقوله ماشي

مين بالرخيص يشيل وبرضه يعدي

ألا دو .....

مين حياخد قلب مقسوم حتتين 

مين يزود هنا حب عمره بالساعات وبالسنين

مين حياخد امل كان مفروش عالناحيتين

مين يزود على نهر أحزان مفرود عالضفتين

بيقولوا العملة الرديئة تطرد العملة النفيسة 

من أسواق ومزادات الحياة 

وانا بعرض أمل حياتي وسعد قلبي ومنتهاه

وحعرض برضه ذكرياتي ومعاها قصة حياة

وحلم كخيوط غزله عنكبوت عشش وكان مبيتغاه

خيوط بتلمع ضي كسراب ونسيت انه اهون ما في الحياة

اتعلقت بيه وفاتني انه لابينجي من السقوط ولا عمره كان في يوم ياناس طوق النجاة..

الا تري .....

مين حيقول اشتريت مين يزود ومين حيقول ارتضيت 

مين حياخذ مين حيشرب مر ويقول ارتويت

مين حياخد نار ويقول استويت

مين حيقول انا ندمت اني هويت واشتريت 

مين حيقول ياريتني ماكنت... وياريت.. 

مصطفى عبد النبى