كتب الشاعر عبد. الحميد وهبه للمحيط العربي قصيدة بعنوان زرع شيطاني

 ( زرع شيطاني)

حُبِك كان وهم بانيت بيه قصور 

كان زرع شيطاني في أرضي البور 

كان أكبر كدبة عِشت أنا فيه 

كان زرع بفرع ضعيف مكسور 

ولا ينفع حتى ولا يضلّل 

فعلاً كان صعب إنه يكمّل 

فيه زرع صبور وبيتحمّل 

وفيه زرع شيطاني مالوهش جذور 

حُبِك كان وهم بانيت بيه قصور 

حُبِك كان زرع مالوش ألوان 

ولا فيه لا خضار ولا حتى أمان 

 حُبِك كان زرع غريب فعلاً 

ناشف على عوده بقى ودبلان 

لو ليل ونهار عاش في المية 

مايفيدش معاه الحنية 

فيه قلوب مهما أهتمّيت بيها 

بتعيش وتموت زي ما هي 

صعبان على قلبي اللي عملتُه

والزرع اللي بإيدي زرعتُه 

أول ما لاقيته إنه شيطاني 

سرعان ما جريت روحت قلعتُه 

كان مين يعرف أو مين  يدرى 

إن كل ده يحصل أو يجرى 

لو كنت في يوم محتاج تزرع 

إفحص وإختار نوع البذرة 

بقلمي عبدالحميد وهبه