كتب للشاعر نصر سيد بدر للمحيط العربي قصيدة بعنوان بيتنا بتاع زمان

 بيتنا بتاع زمان

هات لي بيتنا واءتناسه

هات لي بيتنا وهات لي ناسه

اللي حضنوا واللي باسوا

فينا واحنا صغيرين..

لما كنا تعبانين...

هات لي بيت عشرة سنين

البيوت كان ليها ريحه..

البيوت كان فيها حب

البيوت كانت مريحه

كان عمودها اب صلب

عاشها ناس صادقه وصريحه

كات قلوبهم اصفي قلب..

كنا اطفال في البدايه

كل يوم نسمع حكايه

من جدودنا الطيبين..

راحو فين..واحنا فين؟؟

البيوت جواها ناس

كان كلامهم بالمقاس

والقلوب لؤلؤ وماس

زى ناسها حنينين..

كان ابويا امام يصلي

يقرأ القرآن تمللي

يدعي واحنا نقول امين

فين عيونه الطيبين ؟؟

راح ابويا.وراحت امي

سبت بيتنا..سكنت همي

بيتنا اللي كان براح..

استريح م الجراح..

هو بيتنا بتاع زمان.

.......شعر

نصر سيد بدر

..القاهره..........