كتب الشاعر عبد الحميد وهبة للمحيط العربي قصيدة بعنوان دمعة عيني

 ( دمعة عيني )

لمّا دمعة عيني تنزل وتشوفيها 

مش بقولك مِدي إيدك وإمسحيها 

قبل ما اتكلم وأقولك أي حاجه 

كان لابد حبيبتي إنك تفهميها 

فيها كل كلمة كان صعب إني أقولها 

فيها فرحة عمري وسنيني بطولها 

فيها أحلامي اللي ماقدرتش أطولها 

اللي كان والله  نفسي  تحققيها 

لمّا دمعة عيني تنزل وتشوفيها 

لمّا يظهر جوه عيني كلام كتير 

ده يدل أكيد على حبي الكبير  

واللي شايله في قلبي ليكي من زمان

بس مكتوبله يعيش جواه أسير  

لو في مرة قدرتي إنك تفهميه 

كنتي يعني بدون كلام هترجميه 

كنتي يعني عرفتي إنك جوه قلبي 

لسه عايشه حبيبتي والله وساكنة فيه 

لمّا دمعة عيني تنزل ع الخدود 

حاجة ظاهرة أكيد ماتحتاجشي لشهود 

ده يدل أكيد على حبي الكبير 

اللي يعني مالوش مدى ومالوش حدود 

كان لابد من البداية تقدّري 

واللي حبك كنتي فيه  تفكّري 

مش هيجرى حاجة ليكي وقتها 

لمّا يعني تحسي بيه أو تسهري

بقلمي عبدالحميد وهبه